رانٽو عبدالقادر

رانٽو، عبدالقادر: سنڌ جو ناميارو اديب ۽ سياستدان، عبدالقادر رانٽو، 12 فبروري 1950ع تي محمد خان جي گهر، ڳوٺ رانٽا، تعلقي سجاول، ضلعي ٺٽي ۾ ڄائو. هن شروعاتي تعليم پنهنجي ڳوٺ جي پرائمري اسڪول مان حاصل ڪئي، 1963ع ۾ ٺٽي مان مڊل پاس ڪيائين ۽ غربت سبب اڳتي نه پڙهي سگهيو. پيٽ گذر لاءِ شروع ۾ هارپو ڪيائين ۽ اڳتي هلي شهيد فاضل راهوءَ جي شخصيت کان متاثر ٿي، سنڌ جي سياست ۾ دلچسپي وٺي، ڪارڪن طور ڪم ڪرڻ لڳو، پر ڪجهه وقت کان پوءِ نامور سياستدان ۽ دانشور رسول بخش پليجي سان گڏجي سنڌ جي حقن لاءِ جدوجهد ڪرڻ لڳو. پنهنجي سياسي جدوجهد دوران ڪيترا ڀيرا جيل به ويو، جنهن ۾ 1983ع ۾ ضياء الحق جي آمريت خلاف ملڪ ۾ هلندڙ جمهوري جدوجهد، ايم. آر. ڊي تحريڪ ۽ 2005ع ۾ پرويز مشرف جي حڪومت واري دور ۾ عوامي تحريڪ پاران گريٽر ٿل ڪئنال خلاف ڪنڌڪوٽ کان ڪراچيءَ تائين نڪتل لانگ مارچ ۾ پڻ گرفتار ٿيو. هي عوامي تحريڪ جي پليٽفارم تان ڪيترين سياسي سرگرمين ۾ حصو وٺي چڪو آهي، جن ۾ ڪالاباغ ڊئم، ٿل ڪئنال خلاف جدوجهد، دهشتگردي، وڏيرن جي خانگي جيلن کي ختم ڪرڻ، ڪاروڪاري، جرڳا سسٽم سميت چيف جسٽس جي بحاليءَ ۽ بلدياتي نظام خلاف جدوجهد شامل آهن. هي هن وقت تائين هاري تحريڪ ۽ عوامي تحريڪ جي اهم عهدن تي رهيو آهي. پريس سيڪريٽري، جنرل سيڪريٽري، نائب صدر، مرڪزي صدر جي حيثيت سان سياسي سرگرمين ۾ مصروف رهيو. اهڙي جدوجهد سبب سندس ڪهاڻين ۽ شاعريءَ ۾ قومي ۽ مزاحمتي رنگ نمايان نظر اچي ٿو. سندس ڇپيل ڪتابن ۾ (1) سياست جا روپ ٻهروپ (مضمون،تاثرات) (2) ڪرڪو واڪو وس (مضمون، تاثرات) (3) ڏکيا سکيا ڏينهڙا (پهريون ڀاڱو-آتم ڪٿا) شامل آهن. سندس لکڻيون سنڌ جي عملي، ادبي توڙي سياسي رسالن ۽ اخبارن ۾ ڇپجنديون رهيون آهن، جن ۾ ماهوار تحريڪ، ڪاپڙي ميگزين، روزاني برسات، خلق، الک، عبرت، جاڳو ۽ سنڌ وغيره شامل آهن. قادر رانٽو 1990ع واري ڏهاڪي ۾ پريس ڪلب ٺٽي جو جنرل سيڪريٽري پڻ رهيو. عبدالقادر رانٽو سنڌي ادب ۾ ’ڏاڏا قادر‘ ۽ ’پورهيت‘ جي نالي سان لکندو رهيو آهي. اڄڪلهه هو سياسي سرگرمين جي حوالي سان حيدرآباد ۾ رهائش پذير آهي.

داخلا ۾ استعمال ٿيل تاريخون

1950.02.12  عيسوي

سنڌ جو ناميارو اديب ۽ سياستدان، عبدالقادر رانٽو، 12 فبروري 1950ع تي محمد خان جي گهر، ڳوٺ رانٽا، تعلقي سجاول، ضلعي ٺٽي ۾ ڄائو.

اديب - ڀاڱي جون ٻِيون داخلائون